हरयाणा नंबर वन कोन्या

हरयाणा नंबर वन कोन्या 
फोर लेन और मॉल म्हारा चेहरा खूब चमकाया रै
लिंग अनुपात अनीमिया नै महारै कालस लगायारै
दो छोर म्हारे हरयाने के नहीं मेरी समझ मैं आवैं 
एक कान्ही सबते बढ़िया  कार हरियानावासी बनावैं 
महिला भ्रूण हत्या करकै  सबतैं  तेज कार चलावैं 
गर्भ वती महिला खून कमी जापे के माह मरजयावैं 
सोच सोच कै  इन बातां नै दिमाग मेरा चकराया रै|
आर्थिक विकास घना सामाजिक विकास थोडा बताते
विकास मॉडल मै मोजूद कमी नहीं खोल कै दिखाते
सचाई नै आंकडों  बीच कई बुद्धिजीवी बी छिपाते
म्हारे नेता बी सचाई तै बहोत घना आज घबराते
पांचो घी मैं जिसकी सैं  हरियाणा नंबर वन भाया रै|
आर्थिक विकास की माया देखो पैसा छाया चारो और
नंबर वन हरियाणा का मचाया चारो कान्ही शोर
धरती बिकती जा म्हारी औरों  के बिक़े डांगर ढोर
शाह नै मात देवैं  ये समाज सेवी बनकै  ठग चोर
चोर दवारा साह खुले के मैं जाता रोजाना धमकाया रै|
कई बार सोचूँ लोट खाट मैं आज हुआ किसा विकास यो
दिमाग भन्नाया सै मेरा सोचै कदे होरया हो विनास यो
ठेकेदारी का बोलबाला सै करता म्हारा उपहास यो
विकास हुआ या विनास हिल गया मेरा विश्वास यो
रणबीर बरोने वाला ना इनकी बहका मैं आया रै |।